میں، انصار عبدالقہار،کنو ینر یونائیٹڈ کراچستان موومنٹ،ابتدائی طورپرعظیم شہر کراچی سے وابستہ اُن تمام تبدیلی پسند، اصلاحات پسند اور انقلاب پسند عوام کو، جو پاکستان سمیت دنیا کے کسی بھی ملک میں مقیم ہیں کو،دعوت دیتا ہوں کہ عظیم شہر کراچی کے وسیع ترمفادات کی تکمیل کیلئے، پاکستان کے رجسٹرڈ ووٹرز کی سپریم نیشنل موومنٹ یعنی یونائیٹڈ کراچستان موومنٹ میں شمولیت اختیار کریں۔جب تک عظیم شہر کراچی کا قبلہ درست نہیں ہوگا، پاکستان کبھی بھی درست سمت میں ترقی کا سفرنہیں کر سکے گا۔ دنیا میں پاکستان کے بعد وجود میں آنے والے ممالک آج آسمان کی بلندیوں کو چھو رہے ہیں اور پاکستان کی سڑکوں، گلیوں میں خاک، دھول، مٹی، دھند،گرد و غبار کا ڈیرہ ہے جبکہ عظیم شہرکراچی کو منظم سازش کے تحت ”سندھی گوٹھ“ بنا دیا گیا ہے۔قیام پاکستان سے لیکر، آج تک، عظیم شہرکراچی سمیت مکمل پاکستان، اشرافیہ کے مضبوط ہاتھوں یرغمال بنا ہواہے نیز تمام حکومتوں نے، اغرابیہ سے ترقی و خوشحالی اور فلاح و بہبود کے نام پر صرف وعدے کرکے، ووٹ حاصل کئے ہیں لیکن اپنے وعدوں پرکبھی عملدرآمد نہیں کیا ہے لٰہذا آج تک کوئی بھی خواب وعدوں کے مطابق شرمندہ تعبیر نہیں ہوسکا ہے۔ عوام کی حالت اور پاکستان کے حالات تباہی اور بربادی کا خوفناک نظارہ پیش کرتے ہیں۔ پاکستانی قوم قرضوں کے بھاری بوجھ تلے گروی رکھی جا چکی ہے۔قومی رہنماؤں کو عوام کی کوئی فکر اور پرواہ نہیں لیکن المیہ تو یہ بھی ہے کہ خودعوام کو بھی اپنی کوئی فکر اور پرواہ نہیں ہے۔ پاکستان کے ننانوے(99) فیصدعوام خواب غفلت میں پڑے ہوئے ہیں، اور صرف ایک(01) فیصد عوام جاگ رہے ہیں، اور پاکستان کی تباہی اور بربادی کادلسوز نظارہ دیکھ رہے ہیں۔ تاہم، فی الوقت مکمل پاکستان کیلئے جدوجہد ممکن نہیں لٰہذا، ابتدائی طور پر پاکستان کے حالات سدھارنے کیلئے، ”پہلے تعمیر کراچستان، پھر تکمیل پاکستان“کا آغاز کیا جائے گا۔مختصراً،”پہلے کراچستان، پھر پاکستان“ لکھا اور پکارا جائے گا۔